Mae ein tîm o feddygon ac ymarferwyr gofal critigol yn golygu bod Ambiwlans Awyr Cymru yn gallu trin mwy o bobl.

Mae’r meddygon wedi’u dewis yn arbennig ar gyfer y swydd ac yn arbenigo mewn meddygaeth frys, gofal pediatrig, anesthesia a gofal dwys. Ynghyd â’r sgiliau hyn mae ein criwiau’n cario offer arloesol gan gynnwys cynnyrch gwaed.

---

CYNNYRCH GWAED

Ambiwlans Awyr Cymru oedd un o’r timau ambiwlans cyntaf yn Ewrop i gario tri math o gynnyrch gwaed. Mae’r hofrenyddion nawr yn cario celloedd gwaed coch, lyoplas ac ychwanegyn ffibrinogen. Mae'r rhain yn helpu i atal gwaedu ac ailgyflenwi gwaed a gollir gan y claf.

Dywed Dr Dindi Gill: “Mae’r dechneg achub bywyd yma wedi’i hysbrydoli gan feddygaeth y fyddin a defnyddiwyd yn Afghanistan lle mae’n rhaid atal colled gwaed trwm ac ailgyflenwi gwaed ar frys.

“Roedden ni’n un o’r gwasanaethau sifil cyntaf yn Ewrop i gynnig triniaeth o’r fath. Ar hyn o bryd mae rhai gwasanaethau ambiwlans awyr yn y DU ond yn cario celloedd gwaed coch. Mae Ambiwlans Awyr Cymru hefyd yn cario lyoplas ac ychwanegiad ffibrinogen, sy’n helpu’’r broses geulo ac yn atal colled gwaed pellach.”

Celloedd Gwaed Coch: Fel rhan sylfaenol o’r system cylchrediad y gwaed, mae celloedd gwaed coch yn cludo ocsigen i organau’r corff. Mae Ambiwlans Awyr Cymru yn cario gwaed 0 negatif sy’n gydnaws â phob grŵp gwaed arall.

Lyoplas: Plasma hylifol wedi’i rew-sychu, sy'n ffurfio tua 50 y cant o waed. Pan gaiff ei gymysgu â dŵr, gellir ei ddefnyddio i helpu yn ystod trallwysiadau gwaed mewn argyfwng.

Ychwanegiad Ffibrinogen: Dos crynodol o ffibrinogen sy’n helpu’r broses ceulo gwaed. Yn debyg i Lyoplas a chelloedd gwaed coch, caiff ei dynnu o waed a roddir gan aelodau’r cyhoedd. Cyflenwir y gwaed gan Wasanaeth Gwaed Cymru.

---

MONITOR NWY GWAED EPOC

 .       

Mae’r EPOC yn galluogi ein criwiau i gynnal dadansoddiad manwl o waed a fyddai fel arall ond bosibl mewn ysbytai.

Drwy brofi gwaed yn y fan a’r lle, gall tîm yr ambiwlans awyr ddadansoddi’r gwaed o fewn oddeutu pum munud.

Dywedodd Dr Gill: “Mae cynnal profion gwaed yn rhywbeth y byddwn yn ei wneud i unrhyw glaf anhwylus, a gallant helpu i nodi nifer o broblemau mewn cyfnod byr iawn o amser.

“Mae’n ymwneud â deall cyflwr claf cyn gynted â phosib. Drwy gynnal profion yn gynt, gallwn nodi cyflwr claf yn gynt ac arbed amser ar ôl cyrraedd yr ysbyty."

---

SGANIWR UWCHSAIN

Mae meddygon Ambiwlans Awyr hefyd yn meddu ar sganwyr uwchsain, sydd yn helpu i nodi trawma mewnol i organau yn y camau cynnar.

Mae’r sganiwr yn medru adnabod gwaedu mewnol a helpu i ddod o hyd le mae’r gwaed yn cael ei golli o.

Dywed Dr Gill: “Yn debyg i’r EPOC, mae’r sganiwr yn helpu ni i adnabod problemau yn y camau cynnar, sydd hefyd yn arbed amser ar driniaethau pryd mae’r claf yn cyrraedd yr ysbyty.”

“Yn ogystal â gwaedu mewnol, mae’r sganiwr yn medru adnabod trawma i organau er enghraifft ysgyfaint wedi’i ddyllu."

---

MONITOR 'TEMPUS PRO'

Gan ddefnyddio technoleg a ddatblygwyd ar gyfer amgylcheddau morwrol, archwilio a milwrol, mae’r Tempus Pro yn galluogi criwiau i drosglwyddo gwybodaeth ddiagnostig yn ddi-wifr, fel pwls, cyfradd curiad y galon, a lefelau ocsigen. Mae’r wybodaeth hon wedyn yn cael ei darllen gan ysbyty neu glinigydd mewn lleoliad gwahanol, a all roi cyngor ac arweiniad os oes angen, neu baratoi ar gyfer claf critigol cyn iddo gyrraedd yr ysbyty. Dywedodd Dr Gill: “Mae’r Tempus Pro wedi’i ddefnyddio gan luoedd arfog y DU ac yn galluogi clinigwyr i gael y wybodaeth ddiweddaraf am gyflwr claf o bell. Gallant wedyn gynnig cyngor ar driniaeth, neu baratoi ar gyfer y claf cyn iddo gyrraedd yr ysbyty.

“Mae’r Tempus Pro yn cynnwys technoleg sy’n galluogi timau Ambiwlans Awyr Cymru i fod y cyntaf ym Mhrydain i weinyddu anesthetig brys a darparu adborth drwy fideo i dimau clinigol o bell."

---

PEIRIANT ANADLU O'R RADD FLAENAF

Mae’r peiriannau anadlu datblygedig a ddefnyddir gan y timau gofal critigol wedi’u cynllunio i weithio ar bobl o bob oed, o fabanod i’r henoed.

Dywedodd Dr Gill: “Y peiriannau anadlu rydym yn eu defnyddio oedd y rhai cyntaf o’u bath yn y DU, ac meant yn ein helpu i sefydlogi cleifion cyn iddynt gael eu cludo i’r ysbyty agosaf priodol.”

---

CERBYDAU YMATEB CYFLYM

    

Drwy ein partneriaeth â GIG Cymru, mae gan y meddygon ddefnydd o fflyd o Gerbydau Ymateb Cyflym (RRV’s).

Mae’r rhain wedi’u lleoli ledled Cymru ym mhob un o’n pedair canolfan awyr. Bydd hyn yn helpu’r tîm i ymateb i argyfyngau ar y ffordd os oes angen.

Mae pump Audi Q7 wedi cael eu troi’n gerbydau ymateb brys o’r radd flaenaf er mwyn galluogi meddygon i gyrraedd lleoliad yr argyfwng meddygol cyn gynted â phosibl.

Dywedodd Dr Gill: “Pan nad yw’r timau gofal critigol yn hedfan, er enghraifft mewn tywydd niwlog, mae’r cerbydau yn rhan hollbwysig o’r gwaith o ymateb i alwadau, gan gario technoleg o’r radd flaenaf. Mae modd trosglwyddo cit y criw o’r hofrennydd i’r cerbyd ffordd.”.