Taith Tractors Goffa yn Codi Arian Gwerthfawr ar gyfer Ambiwlans Awyr Cymru Mae aelodau Clwb Hen Gerbydau Sir Drefaldwyn wedi codi arian hanfodol ar gyfer Elusen Ambiwlans Awyr Cymru yn ystod taith tractors er cof am lywydd diweddar y clwb. Cynhaliwyd Taith Tractors Goffa Gron Bumford yn gynharach eleni ac, ar gais teulu Mr Bumford, rhoddwyd y £440 a godwyd i'r elusen hofrenyddion sy'n achub bywydau. Teithiodd y 30 o gyfranogwyr a gymerodd ran yn y digwyddiad drwy gymunedau Cyfronydd, Llanfair Caereinion, Cefn Coch, Felin-newydd, Bwlch-y-Ffridd a Betws Cedewain ym Mhowys. Nid dyma'r tro cyntaf i Glwb Hen Gerbydau Sir Drefaldwyn godi arian ar gyfer Ambiwlans Awyr Cymru. Dros y tair blynedd diwethaf, mae wedi cyfrannu £1,125 sy'n swm anhygoel! Dywedodd Dougie Bancroft, un o Swyddogion Codi Arian Cymunedol yr Elusen: “Hoffem ddiolch o galon i deulu Mr Bumford, pawb a gymerodd ran yn y daith tractors, a'r holl gymunedau a roddodd arian yn garedig. Mae'r arian a godwyd gan Glwb Hen Gerbydau Sir Drefaldwyn er cof am Mr Bamford yn waddol addas gan y bydd yn ein galluogi i barhau i helpu pobl pan fyddant mewn angen. “Rydym yn gwybod pa mor bwysig yw ein gwasanaeth i gymunedau gwledig ac mae pob rhodd yn hanfodol er mwyn gwneud yn siŵr y gallwn barhau i gadw ein hofrenyddion yn yr awyr ar gyfer trigolion Sir Drefaldwyn a Chymru.” Ffurfiwyd Clwb Hen Gerbydau Sir Drefaldwyn yn 1994 i'r rhai sydd â diddordeb mewn hen gerbydau a chyfarpar o bob math. Y Clwb sy'n trefnu'r arddangosfeydd hen gerbydau mewn sawl sioe leol, gan gynnwys Cegidfa, Croesoswallt, Llanfyllin, Aberriw a Llanfair Caereinion. Mae Ambiwlans Awyr Cymru yn cynnig gofal critigol uwch a chaiff ei ddisgrifio'n aml fel ‘Adran Achosion Brys sy'n Hedfan’. Mae'r meddygon ymgynghorol a'r ymarferwyr gofal critigol yn fedrus iawn, ac yn cario rhai o'r offer meddygol mwyaf arloesol yn y byd. Mae ganddynt y gallu i drallwyso gwaed, rhoi anesthesia a chynnal llawdriniaethau brys ar safle'r digwyddiad, cyn hedfan y claf yn uniongyrchol i gael gofal arbenigol. Mae gan Ambiwlans Awyr Cymru bedwar hofrennydd wedi'u lleoli ledled Cymru, yn Nafen, Caernarfon, y Trallwng a Chaerdydd. Gan fod yr Elusen bellach yn gweithredu 24/7, mae angen iddi godi £8 miliwn y flwyddyn i gadw'r hofrenyddion yn yr awyr. Mae sawl ffordd y gall y cyhoedd barhau i gefnogi Ambiwlans Awyr Cymru. Mae'r rhain yn cynnwys rhoddion ar-lein, ymuno â Loteri Achub Bywydau'r Elusen neu drwy feddwl am eu ffyrdd arloesol eu hunain o godi arian gartref. I gael rhagor o wybodaeth, ewch i www.ambiwlansawyrcymru.com. Fel arall, gellir tecstio'r gair HELI i 70711 er mwyn rhoi £5. Manage Cookie Preferences