Rosie yn Glanhau Traethau i Godi Arian ar Ben-blwydd Elusen Mae un o wirfoddolwyr Ambiwlans Awyr Cymru wedi herio ei hun i lanhau 20 o draethau fel rhan o'i gweithgarwch codi arian Fy20 ar gyfer yr Elusen. Mae elusen Ambiwlans Awyr Cymru yn dathlu ei phen-blwydd yn 20 oed ac i gydnabod y garreg filltir, mae'r Elusen wedi creu digwyddiad codi arian newydd o'r enw Fy20. Mae Fy20 yn galluogi cyfranogwyr i ddewis gweithgaredd, her neu dasg sy'n ymwneud â'r rhif ‘20’. Bydd Rosie Hemsley, o Landysul, yn glanhau'r 20 o draethau mewn lleoliadau sy'n agos at ei chartref yn ystod mis Mawrth, ac mae'n ystyried yr her yn ‘ffactor cymhellol personol yn ystod y cyfyngiadau symud hyn’. Gan fyfyrio ar y rhesymau dros ddewis yr her hon, dywedodd Rosie: “Penderfynais wneud y gweithgarwch hwn oherwydd mae'n gwneud rhywbeth cadarnhaol i'r amgylchedd lleol, yn ogystal â chodi arian sydd mor angenrheidiol i Ambiwlans Awyr Cymru, gobeithio. Rwyf wedi bod yn frwdfrydig am amgylchedd y môr erioed, rwyf wedi bod yn sgwba-blymiwr, ac rwy'n gwirfoddoli gyda Chanolfan Bywyd Gwyllt Morol Bae Ceredigion yng Ngheinewydd. “Mae ein rôl fel gwirfoddolwyr yn un amrywiol, gan gynnwys cynnal arolygon o anifeiliaid y môr (dolffin trwynbwl yn bennaf) ac ymgysylltu â'r cyhoedd. Cyn i gyfyngiadau symud COVID-19 ddod i rym, gwnaethom drefnu llawer o ddigwyddiadau cyhoeddus i lanhau traethau. “Yn ystod y cyfyngiadau symud, mae llawer ohonom ni, y gwirfoddolwyr, yn dal i lanhau'r traethau a'r lonydd ger ein cartrefi, ac mae wedi bod mor ysbrydoledig i weld pobl allan gyda'u plant ac yn cerdded eu cŵn yn gwneud yr un peth. Mae'r swm o blastig sydd yn ein moroedd, a'r niwed mae hynny'n ei wneud i fywyd gwyllt, yn ofnadwy.” Mae Rosie wedi codi £155 ar gyfer y digwyddiad codi arian yn barod. Gan fyfyrio ar bwysigrwydd yr Elusen, meddai: “Yn fy marn i, mae Ambiwlans Awyr Cymru yn darparu gwasanaeth hanfodol i boblogaeth Cymru. O'i phedair canolfan, gall yr elusen ymateb yn gyflym i alwad o unrhyw ran o'r wlad a chyrraedd mannau na all ambiwlansys tir eu cyrraedd, megis mynyddoedd, clogwyni a damweiniau drwg ar draffyrdd. “Yn bersonol, rwy'n teimlo'n fwy diogel o lawer yn gwybod bod y gwasanaeth ar gael.” Dywedodd Helen Pruett, Swyddog Codi Arian Cymunedol yr Elusen yng Ngogledd Powys: “Pob lwc i Rosie yn ei Her Fy20. Nid yn unig mae'n codi arian ar gyfer ein Helusen, ond mae hefyd wedi dewis gweithgaredd a fydd o fudd i'r cyhoedd a bywyd y môr. Diolch i bawb sydd wedi noddi Rosie hyd yma. Rydym yn gwerthfawrogi eich nawdd yn fawr ac mae'n helpu i gadw ein gwasanaeth 24/7 yn weithredol.” Os bydd unrhyw un yn ystyried glanhau traethau fel rhan o'r her hon, neu'n gyffredinol, hoffai Rosie nodi'r canlynol: Defnyddiwch ffon codi sbwriel, dylech osgoi cyffwrdd ag eitemau, yn enwedig masgiau a chyfarpar diogelu personol sydd wedi'u gwaredu. Gwisgwch fenig a defnyddiwch lanweithydd dwylo. Os dewch ar draws unrhyw eitemau miniog, dilynwch gyngor lleol ar sut i'w gwaredu. Nid yw Rosie wedi pennu targed codi arian iddi ei hun, ond mae'n gobeithio codi cymaint o arian â phosibl. Gallwch ei noddi drwy ei thudalen Just Giving, sef Rosie Hemsley Fy20 / My20. Manage Cookie Preferences