Bydd Her Nofio Bore Nadolig Porthcawl yn dychwelyd i'r môr eleni Bydd Her Nofio Bore Nadolig Porthcawl yn dychwelyd i'r môr eleni ar ôl i’r digwyddiad gael ei gynnal yn rhithiol y llynedd. Bydd her eleni yn nodi 57 mlynedd ers yr her nofio gyntaf, a'r thema fydd ‘Paint the Town Red’, er mwyn dathlu dychweliad y digwyddiad traddodiadol. Bydd hefyd yn dathlu ugain mlynedd ers sefydlu prif elusen eleni - Ambiwlans Awyr Cymru. Yn ogystal â chodi arian ar gyfer yr elusen sy'n achub bywydau, bydd yr Her Nofio Bore Nadolig ar Sandy Beach yn codi arian ar gyfer achosion a sefydliadau amrywiol lleol. Dywedodd Lucy Jones, Ysgrifennydd Her Nofio Bore Nadolig Porthcawl: “Rydym yn hynod falch o gadarnhau y bydd Her Nofio Bore Nadolig Porthcawl yn dychwelyd eleni ar ôl i ni gynnal y digwyddiad yn rhithiol y llynedd. “Er ein bod yn disgwyl i niferoedd mawr fynychu, rydym yn hyderus y bydd y digwyddiad yn ddiogel o ran Covid, a bydd rhagofalon ychwanegol yn cael eu cymryd. Rydym yn gofyn i bobl ddefnyddio maes parcio Salt Lake a maes parcio HiTide, ac iddynt newid gartref neu yn eu ceir os yn bosibl. Dylai pawb hefyd gadw pellter cymdeithasol a gwisgo masgiau os ydynt yn mynd mewn i adeilad. “Gofynnwn i bawb roi yn hael i gefnogi Ambiwlans Awyr Cymru a'r elusennau lleol amrywiol eraill Gallwch ddarllen mwy am sut mae eich rhoddion yn gwneud gwahaniaeth ar ein tudalen Facebook – Porthcawl Christmas Morning Swim.” Mae cofrestru ar gyfer Her Nofio Bore Nadolig Porthcawl yn cychwyn am 10:30am a bydd y nofwyr yn mynd i mewn i'r dŵr am 11:45am. I gael rhagor o wybodaeth ewch i www.Christmasswim.org Os hoffech chi gefnogi'r ymgyrch codi arian, gallwch roi arian i'r achosion da ar-lein drwy'r dudalen GoFundMe - Porthcawl Christmas Morning Swim 2021. Bydd yr arian hwn yn cael ei ddosbarthu i elusennau a sefydliadau amrywiol lleol gan Bwyllgor Nofio y Nadolig. Mae gan Ambiwlans Awyr Cymru bedwar hofrennydd wedi'u lleoli ledled Cymru, yn Nafen, Caernarfon, Y Trallwng a Chaerdydd. Gan fod yr Elusen bellach yn gweithredu 24/7, mae angen iddi godi £8 miliwn y flwyddyn i gadw'r hofrenyddion yn yr awyr. Dywedodd Mark Stevens, Rheolwr Codi Arian Ambiwlans Awyr Cymru: “Rydym yn falch iawn ein bod wedi cael ein dewis fel y brif elusen ar gyfer her nofio bore Nadolig eleni, yn enwedig o gofio ein bod yn dathlu 20 mlynedd ers sefydlu'r elusen. Mae'n wych clywed bod y digwyddiad blynyddol yn dychwelyd i Sandy Beach. “Hoffwn ddiolch i Her Nofio Bore Nadolig Porthcawl am y rôl mae'n ei chwarae i gadw ein hofrenyddion yn yr awyr ac achub bywydau yng Nghymru. Bydd yr holl roddion yn helpu'r elusen i barhau i ddarparu ar gyfer pobl yng Nghymru pan fydd arnynt ein hangen fwyaf.” Mae Ambiwlans Awyr Cymru yn cynnig gofal critigol uwch a chaiff ei ddisgrifio'n aml fel ‘Adran Achosion Brys sy'n Hedfan’. Mae'r meddygon ymgynghorol a'r ymarferwyr gofal critigol yn fedrus iawn, ac yn cario rhai o'r offer meddygol mwyaf arloesol yn y byd. Mae ganddynt y gallu i drallwyso gwaed, rhoi anesthesia a chynnal llawdriniaethau brys ar safle'r digwyddiad, cyn hedfan y claf yn uniongyrchol i gael gofal arbenigol. Mae sawl ffordd y gall y cyhoedd barhau i gefnogi Ambiwlans Awyr Cymru. Mae'r rhain yn cynnwys rhoddion ar-lein, ymuno â Loteri Achub Bywydau'r Elusen neu drwy feddwl am eu ffyrdd arloesol eu hunain o godi arian gartref. I gael rhagor o wybodaeth, ewch i www.ambiwlansawyrcymru.com. Fel arall, gellir tecstio'r gair HELI i 70711 er mwyn rhoi £5. Manage Cookie Preferences