Beth rydym yn ei wneud Newyddion Newyddion Sanna yn Gosod Targed i Dorri Record Llwybr yr Arfordir er mwyn Codi Arian i Ambiwlans Awyr Cymru Mae menyw o Sir Benfro wedi datgan ei bod am osod record newydd drwy redeg ar hyd Llwybr Arfordir Sir Benfro yn yr amser cyflymaf yr wythnos nesaf. Nod Sanna Duthie, sy’n 32 oed ac yn byw yn Aberdaugleddau, yw bod yr ail berson erioed i redeg ar hyd Llwybr Arfordir Sir Benfro i gyd, sy’n 186 o filltiroedd. Mae'n gobeithio cwblhau’r her mewn llai na 64 awr a 32 munud gan achub ar y cyfle i godi arian i Elusen Ambiwlans Awyr Cymru ar yr un pryd. Cafodd y record bresennol ei gosod gan Richard Simpson o Hwlffordd, a gwblhaodd yr her yn 2018. Fel rhedwraig uwchfarathonau , mae eisoes wedi rhedeg 100 milltir mewn llai na 28 awr , ond ei gobaith nawr yw gwella ar hynny a chodi arian i elusen sy'n bwysig iawn iddi ar yr un pryd. Mae Sanna, sy'n hoffi rhedeg ‘rasys am hwyl’, wedi bod yn aros i'r cyfyngiadau symud lacio yng Nghymru er mwyn cwblhau'r her enfawr. Mae wedi gosod y dyddiad ar gyfer yr her, sef dydd Mercher 19 Awst. Wrth drafod sut y mae wedi bod yn paratoi ar gyfer yr her, dywedodd: “Mae'r hyfforddiant wedi mynd yn dda. Rwyf wedi rhedeg dros 300 o filltiroedd y mis dros y pum mis diwethaf felly gobeithio fy mod wedi paratoi fy nghorff yn dda ar gyfer yr her. Rwyf hefyd wedi gallu cael sesiynau tylino chwaraeon unwaith eto, felly mae nhw wedi bod yn ddefnyddiol wrth wella. “Rwy'n hoff iawn o Lwybr Arfordir Sir Benfro . Rwyf wedi rhedeg ar hyd pob rhan ohono, ond nid ar yr un pryd. Rwy'n anelu at gwblhau’r her mewn llai na 60 awr a hoffwn godi arian i’r elusen wych hon sy'n gwasanaethu ein sir. “Rwy'n awyddus iawn i ddechrau arni nawr. Mae bocsys gennyf yn barod sy'n cynnwys fy nghit a bwyd. Rwyf wedi mwynhau bod ar lwybr yr arfordir dros y penwythnosau diwethaf, felly rwy'n edrych ymlaen at dreulio dau ddiwrnod cyfan arno yn gwneud rhywbeth rwy'n hoff iawn ohono ar gyfer achos mor wych.” Dywedodd Sanna ei bod eisoes yn hyfforddi ar gyfer uwchfarathonau ond ei bod yn cydnabod na fydd rhedeg 186 o filltiroedd yn ‘dasg hawdd’ . Ychwanegodd fod llawer o bobl yn ‘meddwl ei bod yn wallgof’ ond yn edmygu ei ‘hystyfnigrwydd’. Caiff ei chefnogi gan ffrindiau a theulu ar ddiwrnod y daith, a fydd yn dechrau yn Nhrefdraeth ac yn gorffen yn Amroth. Wrth drafod y cymorth y mae wedi'i dderbyn, dywedodd Sanna: “Mae fy ngwaith wedi fy nghefnogi, wedi cyfrannu at yr achos ac wedi rhoi amser i ffwrdd i mi gyflawni'r her. Mae fy nhad a fy mhartner wedi bod yn gefnogol iawn. Maent wedi fy helpu i fy ngalluogi i redeg pellteroedd hir a rhoi hwb i mi ar hyd y daith. “Bydd llawer o bobl yn dod i fy ngwylio yn ystod yr her a bydd hyn yn fy nghadw i fynd ac yn fy annog i ddyfalbarhau.” Dywedodd Mark Stevens, Rheolwr Codi Arian De Cymru Ambiwlans Awyr Cymru: “Rydym mor ddiolchgar i Sanna. Mae'n her bersonol anodd ynddi ei hun a byddwn yn ei chefnogi bob cam o’r ffordd at y llinell derfyn – gyda'r gobaith o osod record newydd. Mae'n anhygoel bod Sanna yn dewis codi arian ar gyfer ein gwasanaeth sy'n achub bywydau ar yr un pryd. Rydym mor ddiolchgar iddi am ei chefnogaeth a hoffem ddymuno'n dda iddi." Mae Sanna wedi codi £970 o'i tharged o £2,000 hyd yma. Gallwch ddangos eich cefnogaeth drwy fynd i’w thudalen Just Giving a rhoi arian yn https://www.justgiving.com/fundraising/sanna-duthie2. Mae sawl ffordd y gall y cyhoedd barhau i gefnogi Ambiwlans Awyr Cymru. Mae'r rhain yn cynnwys rhoddion ar-lein, cofrestru ar gyfer Loteri Achub Bywydau yr Elusen, neu drwy feddwl am eu ffyrdd arloesol eu hunain o godi arian – fel Sanna. I gael rhagor o wybodaeth, ewch i www.ambiwlansawyrcymru.com. Fel arall, gellir tecstio'r gair HELI i 70711 er mwyn rhoi £5. Manage Cookie Preferences